Atha trayodaśaḥ paṭalavisaraḥ
Technical Details
atha trayodaśaḥ paṭalavisaraḥ |
atha khalu bhagavāṃ śākyamuniḥ punarapi punarapi śuddhāvāsabhavanamavalokya mañjuśriyaṃ kumārabhūtamāmantrayatesma | asti mañjuśrīḥ ! tvadīyaṃ mantrapaṭalasamastavinyastaviśeṣavidhinā homakarmaṇi prayuktasya vidyāsādhakasya agnyopacaryāviśeṣavidhānataḥ | yatra pratiṣṭhitā sarvavidyācaryāniyuktā sattvā prayujyante | katamaṃ ca tat ||
rahasyavidyāmantrapadāni | tadyathā - om uttiṣṭha haripiṅgala ! lāhitākṣa ! dehi dadāpaya | hū phaṭ phaṭ sarvavighnāṃ vināśaya svāhā | eṣa saḥ mañjuśrīḥ ! paramāgnihṛdayaṃ sarvakarmakaraṃ sarvakāmadam ||
ādau tāvat sādhakena anenāgnihṛdayena sakṛjjaptaṃ ghṛtāhutitrayaṃ agnau hotavyam | agnirāhvānito bhavati | athāprayuktasya śāntikapauṣṭikaraudrakarmeṣu tridhā samidhākāṣṭhāni bhavanti ||
aśokakāṣṭhaṃ śāntyarthe sārdraṃ caiva viśiṣyate |
vitastihastamātraṃ vā tryaṅgulaṃ vāpi cocchṛtam ||
snigdhākārapraśastaṃ tu vidhireṣā vidhīyate |
akoṭaraṃ asuṣiraṃ vāpi śukapatranibhaṃ tathā ||
haritaṃ śuklavarṇaṃ vā kṛṣṇavarṇaṃ vivarjayet |
kṛmibhirna ca bhakṣitaṃ varjyamakoṭaraṃ vāpi sandadhet ||
anyavarṇo prakṛṣṭāstu adharmaścaiva varjitā |
nātiśuṣkā na cārdrāpi na ca dagdhaṃ samārabhe ||
apūtiṃ avakraṃ caiva atyuccaṃ cāpi varjayet |
agnikuṇḍaṃ tathā kṛtvā catuḥkoṇaṃ samantataḥ ||
adhaśceva khanedyatnāccaturhastaṃ pramāṇataḥ |
trihastaṃ dve tu hastāni ekahastaṃ tathaiva ca ||
prāṇibhirvivarjitaṃ nityaṃ siṃhatāsaṃsthitaṃ ca tat |
padmākāraṃ tato vediḥ samantānmaṇḍalākṛtiḥ ||
caturaśraṃ cāpi yatnena kuryāccāpākṛtiṃ tathā |
vajrākārasaṅkāśaṃ ubhayāgraṃ trisūcikam ||
kuryādagnikuṇḍe'smiṃ dvihastā tiyaṃñca tat |
śucau deśe parāmṛṣṭe nadīkūle tathā vare ||
ekasthāvaradeśe ca śmaśāne śūnyaveśmani |
ku + ddhomaṃ susaṃrabdho parvatāgre tathaiva ca ||
śūnyadevakule nityaṃ mahāraṇye tathaiva ca |
yāni sādhanadeśāni kathitānyagrapuḍgalaiḥ ||
etāni sthānānyuktāni homakarmiti sarvataḥ |
kuśaviṇḍakopaviṣṭena sthitvā hastamātraṃ tataḥ ||
kuryāt tatra mantrajño homakarma viśeṣataḥ |
kṣipramebhiḥ sthitaṃ siddhiḥ sthāneṣveva na saṃśayaḥ ||
prāṅmukho udaṅmukho vāpi kuryāt śāntikapauṣṭike |
dakṣiṇena tu raudrāṇi tāni mantrī tu varjayet ||
prāṅmukhe śāntikā siddhiḥ pauṣṭike cāpi udaṅmukhā |
ebhirmantrī sadākālaṃ mantrajāpaṃ tu mārabhet ||
vilvāmraplakṣanyagrodhaiḥ kuryāt karmaṇi pauṣṭikam |
ābhicārukakāṣṭhāni śuṣkakaṭvāmlatīkṣṇakāḥ ||
tāni sarvāṇi varjīta niṣiddhā munibhiḥ sadā |
śāntike pauṣṭike karme sārdrakāṣṭhā praśasyate ||
raudrakarme tathā karmā varjitā munibhiḥ sadā |
teṣāmabhāve samidhānāṃ kāṣṭhaṃ teṣāṃ tu kalpayet ||
samantā kuśasaṃstīrṇaṃ ubhayāgraṃ tu kalpayet |
haritaiḥ snigdhasaṅkāśairmayūragrīvasannibhaiḥ ||
tathāvidhaiḥ kuśairnityaṃ kuryāt śāntikapauṣṭikam |
marakatākāśasaṅkāśaistathā śuṣkaiḥ triṇaiḥ sadā ||
kuryāt pāvakakarmāṇi niṣiddhā jinavarairiha |
nirmale cāmbhaso śuddhe kṛmibhirvarjite sadā ||
tato'bhyukṣya samantā vai kuryāccāpi pradakṣiṇam |
jvālayed vahni yuktātmā upaspṛśya yathāvidhi ||
śucinā tṛṇamūlena kuryādulkā pramāṇataḥ |
muṣṭimātraṃ tato kṛtvā jvālayed vahni yatnataḥ ||
na cāpi mukhavātena vastrāntena vā sadā |
nivāsanaprāvaraṇābhyāṃ varjitā nānyamamvare ||
na cāpi hastavātena upahanyābhiratena vā |
śucivyajanena tathā vastre parṇe cāpi pravātaye ||
samīrite kṛte vahnau ebhirudbhūtamārute |
jvālayedadhimantrajño homārthī susamāhitaḥ ||
trīnvārāṃ tato'bhyukṣe kṛtvā vā apasavyakam |
āhutitrayaṃ tato dadyā ājye gavye tu tatra vai ||
tato kuryāt praṇāmaṃ vai sarvabuddhānatāyinām |
svamantramantranāthaṃ ca tato vande yatheṣṭataḥ ||
agnihṛdaye tato mantre japte japtena vai sadā |
āhvayed vahniyuktātmā puṣpaireva sugandhibhiḥ ||
āhvayati nityaṃ mantrajño sthānaṃ dadyād vicakṣaṇaḥ |
āsanaṃ sthānaṃ datvā tu tena mantreṇa nānyavai ||
dadhiplutamājyamiśraṃ tu madhvāktaṃ samidhāṃ trayam |
juhuyādagnipūjārthaṃ mantrakarmeṇa sarvataḥ ||
ubhayasthaṃ tadā kuryāt samidhānāṃ dravyamiśritam |
ājyamadhvaktasaṃyuktāṃ dadhyamiśre tathaiva ca ||
sahasraṃ lakṣamātraṃ vā śatāṣṭaṃ cāpi kalpayet |
guhyamantrī tathā mantraṃ sakṛjjaptvā kṣipet śikhau ||
jvālāmāline vahnau ekajvāle tathaiva ca |
śāntikarmaṇi juhvīta nirdhūme cāpi pauṣṭikam ||
sadhūme raudrakarmāṇi garhite jinavarṇite |
homakarmaprayuktastu agnau varṇo bhavedyadi ||
śāntike sitavarṇastu śastaṃ jinavaraiḥ sadā |
siddhyanti tatra mantrā vai site'gnau juhvato yadi ||
raktavarṇaṃ tathā nityaṃ pauṣṭikāt siddhimiṣyate |
kṛṣṇe vā dhūmavarṇe ca kapile cāpi pāyikam ||
ityeṣā trividhā siddhiḥ tridhā varṇapravartitā |
anyavarṇābhravarṇā vā vividhākāravarṇitā ||
na siddhisteṣu mantrāṇāṃ punarastīha mahītale |
tādṛśaṃ varṇasaṅkāśaṃ vividhākāravarṇitam ||
śikhiṃ jvalantaṃ dṛṣṭvā tu punaḥ karmaṃ samārabhet |
bhūyo'pi kṛtajāpastu mantrasiddhirbhaved yadi ||
punarhomaṃ pravartīta vidhidṛṣṭena karmaṇā |
visarjyāhvānanā caiva vahniṃ mantramudīrayet ||
pūrvaprakalpitenāpi maṇḍale'smiṃ yathāvidhi |
tenaiva kuryāddhomaṃ vai visarjanāhvānanakarmaṇām ||
sarvakarmāṇi tenaiva kuaryāt tatraiva karmaṇi |
agnicaryā tathārūpaṃ paṭasyāgrata mārabhet ||
siddhyanti tatra mantrā vai pūrvamuktaṃ tathāgataiḥ |
jinavarṇitakarmāṇi kuryānna ca tatra vai sarvataḥ ||
nānyakarmāṇi kurvīta pāpakāni viśeṣataḥ |
garhītā jinavarairyadva viruddhāṃ lokakutsitām ||
uttiṣṭha cakravartirvā bodhisattvo'tha bhūmipaḥ |
pañcābhijñaṃ tathā lābhe devatvaṃ vātha siddhyati ||
paṭe'smin nityayuktajño homakarmaviśāradaḥ |
pātālāṃdhipatyaṃ vā antarīkṣacarāmatha ||
bhaumyadevayakṣatvaṃ yakṣīmākarṣaṇe sadā |
rājye ādhipatye vā viṣaye'smiṃ grāma eva vā ||
vidyādharamasuratvaṃ sarvasattvavaśānuge |
ākarṣaṇe ca bhūtānāṃ mahāsattvāṃ mahātmanām ||
bodhisattvāṃ mahāsattvāṃ daśabhūmisamāśritām |
ānayeddhomakarmeṇa kiṃ punarmānuṣaṃ bhuvi || miṃ
senāpatyaṃ tathā loke aiśvarye ca viśeṣataḥ |
sarvabhūtasamāvaśyaṃ nṛpatatvaṃ tathāpi ca ||
vaśyārthaṃ sarvabhūtānāṃ nṛpatervāpi samaṃ bhuvi |
sarvakarmān tathā nityaṃ kuryāddhomena sarvataḥ ||
sarvato sarvayuktātmā sarvakarma samāśrayet |
niyataṃ siddhyate tasya karma śreyo'rthamuttamam ||
madhyamāścaiva tatraiva siddhimuktā tridhā punaḥ ||
dṛśyate saphalā siddhiḥ homakarme pravartite |
mudrā pañcaśikhāṃ badhvā mantrāṃ caiva keśinīm ||
kuryāt sarvakarmāṇi ātmarakṣāvānudhīḥ |
homakarme pravṛttastu paṭhenmantramimaṃ tataḥ ||
saptajaptāṣṭajaptaṃ vā karme'smiṃ idaṃ sadā |
namaḥ sarvabuddhabodhisattvānāmapratihataśāsanānām ||
tadyathā - om jvala tiṣṭha hū ru ru viśvasambhava sambhave svāhā |
anena mantraprayogeṇa jape kāṣṭhaṃ punaḥ punaḥ |
dvijaptaṃ saptajaptaṃ vā juhyādagnau sa mantravit ||
puṣpadhūpagandha vā sarvaṃ caiva samantataḥ |
vāriṇā mantrajaptena anenaiva tu prokṣayet ||
tato sarvakarmāṇi ārabhed vidhihetunā |
pūrvaprayogeṇaiva karttavyo sarvakarmasu ||
pūrvapañcaśikhāṃ badhvā mahāmudrāṃ yaśasvinīm |
kṛtarakṣī tato bhūtvā keśinyā caiva sadā japī ||
ārabhet sarvakarmāṇi siddhiheto viśāradāḥ |
śakunā yadi dṛśyante śabdā caiva śubhā sadā ||
saphalāstasya mantrā vai varadāne yathepsataḥ |
ādikarmeṣu prayuktastu pravṛttā mantrahetunā ||
saphalā sakalā caiva siddhisteṣu vidhīyate |
jayaśabda paṭaho vā dundubhīnāṃ ca nisvanam ||
siddhiḥ sarvatra hyuktā homakarme samāśritaḥ |
anyā vā śakunā śreṣṭhā pakṣiṇānāṃ vā śubhā rutāḥ ||
vividhākāranirghoṣā śabdārthā jinavarṇitāḥ |
praśastā divyā maṅgalyā divyā manojñā vividhā rutāḥ |
chatradhvajapatākāṃśca yoṣitācāpyalaṅkṛtāḥ |
pūrṇakumbhaṃ tathā ardhadarśanaṃ siddhihetavaḥ ||
anekākāravarṇā vā praśastā lokapūjitā |
teṣāṃ darśana sidhyante mantrā vividhagocarā || iti |
bodhisattvapiṭakāvataṃsakānmahāyānavaipulyasūtrād
āryamañjuśrīmūlakalpāt trayodaśamapaṭalavisaraḥ parisamāptamiti ||